Alat patanun maso itu
Alun biaso lai di Minang
Alun pandai urang batanun
Kok ado bana nan mamakai
Iyolah rajo jo pangulu
Tapi kain nan babali
Dari urang lua nagari.
Tantang kain Pandai Sikek
Nan dibuek orang di situ
Kain upiah, salendang balapak
Ditanun dari banang Makau
Bukan dari banang Ameh.
Pado maso kutika itu
Tak ado akan tandiangnyo
Iyo saluruah Pulau Andaleh
Apo lai di Minangkabau.
Di Kubang urang batanun
Di Silungkang pun ado juo
Tapi indaklah samo
Jo kain Pandai Sikek.
Pado maso dewaso itu
Alun lai ado di tampek lain
Iyo ado urang batanun
Di Aceh di Tapanuli
Di Siak di Palembang
Tapi manuruik kaba barito
Alah kudian itu garan.
Kini si Rancak manyasikan
Baduo dangan Buyuang Geleang
Baapo rancak palaminan
Tampek duduak Rajo Sidi Marajo
Titai kalambu langik langik
Bauta gadang banta ketek
76
