VI. PINANGAN SI RANCAK DITOLAK GANTOSARI
Dek mande Puti Ameh Urai
Dek sayang kaanak kanduang
Anak surang tungga babelang
Dituruik juolah kandaknyo
Disadiokan siriah di carano
Carano baukia tutuik dalamak
Dicari pisang sasikek
Ulu tandan rancak dipandang
Diisi talam duo tigo
Jo nasi lamak singgang ayam
Indak tingga kue-kuenyo
Disuruah mande Rubiah
Batigo jo adiak kanduang diri
Marminang ka Pandai Sikek.
Bajalan Mande Rubiah
Sarato kawan nan baduo
Bajalan jo ati cameh
Takuik pinangnyo indak ditarimo.
Pagi buto inyo barangkek
Indaklah pulo basagiro
Cuma dek takuik kapanasan
Baban barek pulo dibao
Jalan jauah nan ka dihalang.
Tapi sabuah itu dangai
Inyo nak tibo patang ari
Sasudah galanggang usai
Takuik basuo jo urang banyak
Kok tau pulo urang beko
Inyo suruhan dek si Rancak.
Alah mah patang tu garan
Lah sudah sambayang Assar
Baru inyo naiak ustano
93
