Lamo bana inyo bapikia
Lamo inyo baru manjawek
Manjawek jo muko muram
Aia mato balinang-linang.
Ambun Sari: Manolah Kakak kato ambo
Dangakan bana baiak-baiak
Usah kakak salah tarimo
Sarupo kato Tuanku tadi
Kami ingin Kakakpun datang
Pucuak dicinto ulam tibo.
Dari samulo kami cinto
Indak nampak urang nan patuik
Salain rang mudo nan surang tu
Tampan jo takahnyo lah sapadan
Iyo jo Gondan Gantosari.
Tapi anyo akan sabuah
Urangnyo bana nan tak amuah
Iyo si Upiak Gantosari
Bak urang kanai panyakik
Indak dapek nyo dibujuak
Indak mungkin nyo dipaso.
Yo kapatang maso itu
Mancaliak sutan Masuak galanggang
Tasirok darah di dado
Bak dewa dari kayangan
Ati kambang, lah tibo arok.
Lah lamo inyo ndak nampak
Bia disabuik inyo si Rancak
Indak ambo manyangko garan
Baitu bana kan gombangnyo.
Kini ko apo ka disabuik
Tapi apo ka dibuek
95
