Anak indak manuruik kato
Inyo barajo diatinyo
Inyo basutan di matonyo.
Bia disuruah nyo ka mari
Nak kakak dangakan bana
Apo nan jadi alangannyo
Usahlah kami diburuakkan
Nyato baparang kito nanti
Kok indak baparang sanjato
Mungkin baparang pado batin.
Manolah Upiak dayang-dayang
Panggia si Ganto kateh anjuang
Suruah datang inyo ka mari
Kami ko andak babicaro.
Lai sabanta antaronyo
Turun si Ganto dari anjuang
Diiriangkan dayang-dayang banyak
Rancak nan bukan alang-alang
Bak bulan dipaga bintang.
Iyo dek adiak Ameh Urai
Nan datang samo jo Rubiah
Lah samo suko kaduonyo
Arok nan bukan alang-alang
Ingin mambao Puti Rancak
Digungguang dibao tabang
Dibao tabang ka Batipuah.
Lah sampai inyo ka ruangan
Tampak duduak ayah jo bundo
Inyo basimpuah jo manyambah
Disusun jari nan sapuluah
Sambah sabaleh jo kapalo
Bakato sapatah tido.
Puti Ambun Suri: Manolah Upiak Gantosari
Halaman:Sutan Tumangguang Nan Rancak di Labuah.pdf/98
↓Laman ko alah sah
