Dangakan bana kato ande
Iyo tatakok tu dek ande
Tantang rang mudo nan kapatang
Iyo inyo Sutan Tumangguang
Ado bakandak dalam ati
Andak naiak ka rumah nangko.
Dek lamo si Ganto baru manjawek
Bakato pulo mah ayahnyo
Iyo Rajo Pandai Sikek
Datuak Sidi Marajo.
Rajo Pandai Sikek: Manolah Upiak janyo ayah
Lai tapikia Upiak garan
Jiko pandapek lai barubah
Iyo barubah ka nan elok
Sananglah pulo ati kami.
Gantosari: Ampunlah ambo ayah bundo
Kato alah ambo katokan
Kaputusan alah ambo agiah
Apo juo lai nan ditanyo.
Rajo Sidi Marajo: Mano Upiak Gantosari
Kok itu juo nan Upiak sabuik
Indak amuah manuruik kato
Katokan banalah tu kini
Kapado urang Batipuah ko
Usah kami nan dikatokan
Indak namuah manarimo
Balinduang di balakang anak
Manuduah Upiak nan tak nio.
Kami ndak amuah disalahkan
Mancari bala itu beko
Putuih kaum baputuih rotan
Awak baelok salamo ko
Baparang batin nan ka datang
Badandam tujuah katurunan.
97
