Kini baitu malah dek Adiak, barilah izin denai malangkah, supayo nak salamaik pulang pai, nak sanang pulo paratian,”
Sanan manjawab Siti Jamilah, “Manolah Angku joden di angku, jikok itu nan Angku katokan, itu timbangan Angku sandiri, manyuruah managah denai pun tidak, hanyo sabuah nan denai pintak, lapehkan malah baban denai dulu, basungguah denai mamintak ka Angku.”
Mandanga kato nan bak kian, bakato Lareh Simawang, bakato sadang bapantun:
“Tumbuah birah di laman
Tumbuah sarumpun jo kaladi;
Lah sudah buek jo sukatan
Tidak buliah batangguah lai.”
</poem.
Sanan manjawab Siti Jamilah, bakato sadang manangih,
“Oi Angku joden di angku, denai di dalam bababan barek,
lapehkan dulu denai basalin, Angku kan lah samo tahu juo, denai nan
tidak badunsanak, bamamak baniniak tidak, bapak jo mandeh pun
lai tidak, kok tumbuah badan sakik-sakik, kok tumbuah ngilu jo
paniang, siapo ka mamintak ubek, kok si Asamsudin balunlah gadang,
nan Siti Darama nak rang manjo, awak rang dagang tak batantu,
itulah nan denai rusuahkan.”
Kato bajawab dek Tuanku Lareh simawang:
<poem>
“Anak rang Salo di Andaleh
Bladang ka Koto Pariaman;
Kandak den Tuanku Lareh
Pantang diambek ditagahkan.”
Manjawab Siti Jamilah, bakato sambia manangih sadu-sadan:
“Simantuang di Parik Putuih
Ureknyo ka tangah jalan
Tak buliah manggapai lai;
18
