Hati Paibo Mambaok Sansai
Pado maso dewaso itu, tipak di diri Siti Jamilah, alah manangih sadu-sadan, mangana untuang jo parasaian, ayaia mato badarai-darai, nan bak maniak putuih talinyo, nan bak intan putuih pangarangnyo, badan nan tidak ba nan kanduang, babapak bamandeh tidak, badunsanak pun jauah sakali, takana bana sakutiko, dihimbau malah anak nan baduo, iyo si Darama jo si Asamsudin, bapantun barusuah hati.
“Anak kanduang si Darama nan surang si Asamsudin, dangakan dek kalian jaleh-jaleh, simakkan dek kalian elok-elok:
Ka pakan ka kampuang Baso
Mambali kain basahan;
Untuang kito tidak babangso
Sa pai jo budak balian.
Anak kanduang si Darama, marasai bana malah kito, kana bana dek anak untuang kito, lah dapek di ayah kau pangganti mandeh, iyolah si Siti Rawani.”
Di hari sahari itu, kununlah Lareh Simawang, lah mahimbau rang jago gadang.“Manolah rang jago gadang, japuiklah kudo ka kandang, lakekkan sakali palanonyo.”
24
