Lah diracak malah kudo, cambuik lakek kudo balari, kudo manduo balari kancang, banyaklah kelok nan talalui, jauah basarang hampia juo, dakek raso ka tibo, lah tibo garan di sanan, iyo di laman rumah Siti Rawani, kan iyo basaluak tando samaso itu
Alah sudah batimbang tando, baliaupun sugiro turun ka laman, diiriangkan dek Angku Kapalo.
Aluran dek Tuanku Lareh, sasudah putuih mupakat tantang hari kutikonyo, babaliak pulang hanyo lai, iyo ka rumah Siti Jamilah.
Dipacu kudo samaso itu, baru sampai inyo di sanan, dihimbau rang jago gadang, disuruah masuakkan kudo ka dalam kandang.
Kan iyo samaso itu, naiak ka rumah hanyo lai, duduak bajuntai di kurisi, sanan bakato sambia bapantun, mahibur hati Siti Jamilah:
“Maro-maro di tangah rimbo
Ka tungkek Sutan Manangkerang;
Tidak denai ka lamo-lamo
Baru tibo babaliak pulang.
Pancuanglah taleh rang Kurinci
Ambiak pambungkuih tu daunnyo;
Sungguahpun denai pai babini
Awakden di rumah iko juo.”
Sanan manjawab Siti Jamilah, “Kok itu Angku katokan, indaklah ka mangapo dek kami urang dagang, walaupun babilang tahun atau bamusin.
Dangakan malah dek Angku, ibarat pantun dagang sansai:
Baparak ka parak urang
Tidaklah buliah batanam tabu;
Bamamak ka mamak urang
Tidak buliah tampek mangadu.
Ka ladang rang Koto Tuo
Tumbuahlah bayam jarang-jarang
Talang dilateh nak rang Subarang;
26
