Kami rang dagang tak babangso
Antah siapo ka ditompang
Antah Cino di Padang Panjang.”
Mandanga kato nan bak kian, marentak turun Lareh Simawang, sadangkan dek Siti Jamilah, dipikia-pikia dihinokkan di dalam hati, buruak nan tidak elok lai, dibaok tidua tidak takalokkan, dibaok duduak kaluah-kasah, makan hati barulam jantuang, nasi dimakan raso sakam, ayia diminum sambiluan, ayia mato badaraidarai, bakato sadu-sadan,
“Oi anak kanduang Siti Darama nan surang si Asamsudin, pado hiduik baputiah mato, eloklah mati bakalang tanah, awak ka gadang juo janyo urang, kok mati kito kini-kini, tidaklah ado nan ka maratoki, kini baitu malah dek kalian, mandi balimau malah kito, iyo ka lubuak mato kuciang.”
Mandanga kato mandeh kanduang, sanan manjawab si Asamsudin, “Mandeh kanduang joden di Mandeh, dangakan pulo malah di Mandeh, usahlah kito pai ka kian, di siko kan ayia lai janiah juo, di siko kan lai juo sayak nan landai.”
“Usah dijawab kato mandeh, takasia awak janyo urang, mandi balimau molah kito lai, “baitu kato si Darama.
Manjawab pulo si Asamsudin, “Manolah Aciak janyo ambo, dangakan malah dek Aciak pantun ambo:
Kok mandi badan bak kini
Mandi ka lubuak urang Canduang
Bakusuak jo limau kapeh;
Kok mati badan bak kini
Manangih tanah manganduang
Mukasuik hati alun lai lapeh.”
Sanan manjawab Siti Jamilah:
“Rumah gadang di Pariaman
28
