Rumah si Upiak nan di ranah;
Pado malu kito tangguangkan
Eloklah mati bakalang tanah.”
Lalu turun ka laman, turunlah inyo batigo baranak, sanan bakato Siti Jamilah, kapado urang jago gadang, “Hunikan rumah dek urang jago, kami ka pai mandi, iyo ka bukik Si Galo Gandang, nan ka lubuak mato kuciang, kami bajalan hanyo lai, bajalan batigo baranak.”
Sanan manjawab rang jago gadang, “Manolah Aciak janyo denai, kok itu nan Aciak katokan, sugiro malah Aciak babaliak pulang, denai takuik di rumah surang, pintu kok tidak nan bapasak, urang kok datang nan batanyo, ka mano Aciak denai katokan?”
Bakato Siti Jamilah:
“Sutan Saidi pai bapikek
Jarek di mano dipauikkan
Di ladang rang Koto Tuo;
Kok tumbuah sudi jo siasek
Nan ka maibo usah dikatokan
Binaso kami batigo.”
Manjawab rang jago gadang, “Dangakan pulo bicaro denai dek Aciak:
Lah lareh bungo limau kapeh
Duo jo bungo limau paga;
Badatuih hati den malapeh
Badabok darah den nan tingga.”
Kato nan tak bajawab lai, bajalanlah Siti Jamilah, bajalan baibo hati, badan saraso bayang-bayang, ayia mato badarai-darai, mairiang si Darama di sabalah suok, nan di kida si Asamsudin, anak dibimbiang kaduonyo.
Hari nan sadang tangah hari, sadang bunta bayang-bayang, sadang nan litak-letai anjiang, sadang bakulik si alang bangkeh,
30
