Bakato pulo mandehnyo Siti Jamilah, bapantun baibarat:
“Patahlah daun rigo-rigo
Kaduo jo daun bungo kinari
Dibaok angin ka patani;
Ka mari sakali nangko
Tantukan bana kini-kini
Tidak mungkin barulang lai.”
Manjawab si Darama, “Toh molah kito babaliak pulang.” Alah basugiro katigonyo, babaliak pulang hanyo lai, alah dikamehi sagalo pakaian, lalu bakato maso itu:
“Tinggi malanjuak lah iko aua
Tidak ka kami tabang lai;
Tingga mancaguik lah iko sumua
Tidak ka kami jalang lai.”
Salamo lambek nan bak kian, alah sarantang pajalanan, cukuik kaduo rantang panjang, basuo jalan basimpang duo, lalu dipiliah nan bakelok ka suok, jalan nangko iyo ka rumah bako si Darama.
Bajalanlah inyo bairiang-iriang batigo, hampia ka tibo hanyo lai, iyo di laman rumah Siti Rawaiyah, surang pun tiado nan nampak, dek untuang ka paruntuangan, manjanguah Siti Rawiyah, lalu bapantun baibarat:
Cubadak di tangah laman
Tataruang dek ampu kaki
Usah kakak tatagun di laman
Itu cibuak basuahlah kaki.”
Manjawab mandeh si Asamsudin:
“Mangko den pai ka pakan
Sagan den pai ka sawah;
Mangko den tagak di laman
Den sangko tidak di rumah.
34
