Bukan den ka nari-nari sajo
Kanari nak rang subarang;
Bukan den ka mari-mari sajo
Gadang mukasuik nan manjalang.”
Manjawab Siti Rawiyah, “Oi Aciak den Siti Jamilah, parenai malah Aciak ka rumah, lapiak alah sudah denai bantangkan, iko kami sadang barundiang-rundiang.”
Alah naiak Siti Jamilah, batigo jo anaknyo, lalu duduak di tangah rumah, sanan bakato Siti Rawiyah.
“Manolah Aciak kanduang Siti Jamilah, lah lamo kito tidak batamu, dek rintang karajo nan tak kunjuang salasai, tiok dikakok batambah juo.
Kambanglah jalo diserakkan
Kanailah anak tali-tali;
Sado nan ado dilatakkan
Kok tidak ka mano ka dicari.”
Manjawab Siti Jamilah:
“Kok iyo kanai tali-tali
Kapalo usah dibuangkan;
Baru talatak tabuang kopi
Lapeh rasonyo hauih rakuangan.”
Sasudah minum jo makan, bakato Siti Jamilah, “Aciak den Siti Rawiyah, dangakan malah dek Aciak elok-elok, usah Aciak salah tarimo, dek karano denai di dalam bababan barek, nyawo di dalam tangan Allah, kok lai untuang ka elok, salamaik denai basalin, sarato basuruah sapanjang syarak, manuruik adat pun damikian, kok talonsong suruik, kok talangkah kumbali.
Kalau ado muluik nan tadorong, ataupun kato-kato sorong lompatan, ataupun siliak salahnyo, bialah tasabuik salah jo pantangan, ataupun tajambo nan alah talangkah, harap sungguah denai pintak, rilah jo maaf denai harok kini-kini, samantaro badan lai sehat kini nangko.
36
