Manjawab Siti Rawiyah, sambia bapantun baibarat:
“Rang Solok jo Lubuak Aluang
Parang jo anak Kurai Taji;
Bia pun ka pulang Aciak Kanduang
Ulangi juo kami ka mari.
Taluak Sikujua Banda Dalam
Siang-siangi malah padi
Kok lai lapang pajajaran;
Biapun bajauhan tampek diam
Ulangi juo malah ka mari
Kok lai onggang pakarajaan.”
Manjawab Siti Jamilah:
“Ditariak batang rigo-rigo
Duo jo batang saliguri;
Kok pulang sakali nangko
Mungkin tidak babaliak lai.
Baju cela lampisan lakan
Dibaok urang Padang Tarok;
Rilahkan sajo sado tamakan
Isuak sajo manjadi buah ratok.”
Inyo bajalan hanyo lai, dek lamo-lambek di jalan, jauah bsarang dakek juo, kok tibo sampailah garan, lah tibo inyo di laman, bakato Siti Jamilah,
“Manolah Tuan rang jago gadang, pailah Tuan pai manyabik, pai mandikan pulo kudo putiah.”
Birawari rang jago gadang, mandanga kato nan bak kian, lalu diambiak sabik jo rajuik, diirik kudo nan putiah ka batang ayia.
Gadanglah ayia di Antokan
Tarandam batang pilin-pilin;
Di siko kaba dihantikan
Dialiah kaba ka nan lain.
40
