↓Laman ko alah sah
Basimbah Darah
Padi sipuluik dari Talu
Dibaok urang ka Malampah;
Pado hiduik disungkuik malu
Eloklah mati bakalang tanah.
Kununlah dek Siti Jamilah, kaluah-kasah manahan hati, lalu bapantun samo surang:
“Batang kaladi batang taleh
Dimakan ureknyo dek si Lago;
Nak sanang hati Tuanku Lareh
Bialah mati kami batigo.
Tidak den sangko rigo-rigo
Pipik sinanduang makan padi;
Indak den sangko ka bak nangko
Pisau dikanduang makan hati.”
Kan iyo samaso itu, lah dibukak lamari camin, dilantak peti nan gadang, diambiak pisau rencong Aceh, dikaluakan pakaian tigo pasalinan, dipakai anak kaduonyo.
Sasudah mamakai Siti Jamilah, dibaok tagak ka camin gadang, bakato inyo samaso itu.
44
