“Anak kanduang Asamsudin nan surang Siti Darama, dangakan malah dek kalian elok-elok, rilahkan angok kaduonyo.
Ijuak mansi sanganyo mansi
Manganyam denai sarayokan
Di balai nak rang Batusangka;
Isuak mati kini ka mati
Elok kini dirilahkan
Nak basanang hati nan tingga.”
Ditutuik pintu kasadonyo, disingkokkan cando kulambu, laloklah inyo katigonyo, di kida Siti Darama, nan disuok Asamsudin.
Agaklah dek Siti Jamilah, inyo barusuah-rusuah hati juo, sanan bakato hanyo lai. “Laloklah anak kanduang kaduonyo, laloklah nak denai nyanyikan:
Urang baralek di tangah sawah
Di sawah urang Bangkahulu;
Aja sampai gadang lah sudah
Tidak ka siapo ka mangadu.”
Barundiang-rundiang juo sadang manangih, lah basah malah banta sabuah, bapantun-pantun juo samaso itu:
“Anak buayo di dlam tabek
Mati dibunuah nak rang Talang
Bangkai dibuang ka muaro;
Harok balaki rang bapangkek
Disangko hiduik lai ka sanang
Kironyo racun dibarikan.
Lai baladang rang Bingkudu
Ditanam bijo mangga pauah
Buliah dipangkua di pasiang;
Sadari ketek anak den pangku
Alun gadang lah den bunuah
Nak sanang hati Lareh Simawang.
46
