Usah takuik anak ka mandi
Samo bakusuak daun capo;
Usah takuik anak ka mati
Samo sakubua kito batigo.”
Lah lalok inyo Siti Darama, lalu diambiaknyo pisau hanyo lai, diirihnyo lihia Siti Darama, pisau lakek anak mangaluah, nan bak caciang kanai pangkua, bak cando ayam kanai lakak, bak si coreng dijajakan, baputa-puta dalam biliak, mahampeh-hampehkan badan, malacuik-lucuikkan diri, sanan bakato Siti Jamilah.
“Anak kanduang si Asamsudin, Siti Darama alah denai bunuah, mati surang mati batigo, rencong Aceh nangko nan ka manyudahi, hari nan sahari nangko, cupak panuah gantang balanjuang, sampailah hari kutikonyo, usah maupek anak pado mandeh, usah manyasa mati ketek, usah mandeh disasali.”
Manjawab si Asamsudin, ayia mato jatuah badarai-darai, “Oi Mandeh joden di mandeh, usahlah baitu kato Mandeh, suruikkan hati ka nan bana, usah dituruikkan dayo ibilih, niat hati denai gadang bana, disiang hari pai sikolah, malam hari pai mangaji, kini itu nan Mandeh katokan, rusuah hati denai mangiroi, tidaklah ado padoman pado denai lai.
Halaukan kabau nan sabaleh
Baok ka lurah bari makan
Di sanan rumpuik mudo-mudo;
Alah malang denai bamandeh
Hatinyo digaro setan
Kakak den mati dibunuahnyo.”
Bakato Siti Jamilah, “Anak kanduang si Asamsudin, usahlah anak balari-lari juo, mari ka mari malah anak.”
Lorong kapado si Asamsudin, mancaliak pisau rencong Aceh, mandingin raso bulu kuduak, bakato sadang manangih.
48
