Pado maso dewaso itu, bakaja cacak ateh paran, bundaklah ayam dalam kandang, tabantang munggu ateh langik, badantuang cando patuih tungga, tando alamat urang mati badarah.
Bakato juo Siti Jamilah, “Usah Anak balari-lari juo, mari ka mari Anak kanduang, pisau lah sudah denai kiliakan, mati surang mati batigo, sakubua kito katigonyo, alah ka sanang hati anak.”
Manjawab sanan si Asamsudin, “Di mano denai takkan lari, denai tak suko ka Mandeh dabiah, denai tak suko ka Mandeh bunuah.”
Mandanga kato damikian, tabik bangihnyo Siti Jamilah, lalu dikajanyo si Asamsudin, lah manggabai-gabai si Asamsudin, manggabai mamanjek dindiang, kakinyo ditangkok dek Siti Jamilah, dibantunkan cando ka bawah, badabua tibo di lantai, tidak dapek manggabai lai, ayia mato badarai-darai, bakato inyo maso itu, “Kalau baitu nan jadinyo, ka baa pulo janyo denai lai, mujua denai mati nan bak kini, kok sampai denai gadang, mungkin banyak sansaronyo, “lalu tidua inyo lai.
Sadang lalok nantun, bakato juo si Asamsudin,”Oi Mandeh joden di mandeh, usah diosohkan makan pisau, padiah dek denai kalau baitu.
Ikan putiah baradai-radai
Dikayia jo papeh rotan;
Denai ka mati hanyo lai
Ayia susu Mandeh rilahkan.”
Manjawab Siti Jamilah, “Piciangkan malah mato Asamsudin, sarahkan diri pado Allah.”
Mato tapiciang pisau pun lakek anak mangaluah, bak caciang kanai pangkua, mahampeh-hampehkan diri, malcuik-lacuikkan badan.
Alah mati si Asamsudin, sanan tamanuang Siti Jamilah, ayia mato badarai-darai, basabuang pangana maso itu, adang-adang tibo
52
