Sadang batutua-tutua nantun, tampaklah surang laki-laki, balari pulo Tuanku Lareh Simawang, balari masuak ka dalam biliak, itulah karajonyo tiok hari.
Lah babilang dukun pandai ubek, lah baungguak ubek sapanuah rumah, usahkan panyakik nan ka cegak, antah kok batambah kareh nan lai, sanan bapantun urang dalam kampuang:
Anak urang Tanjuang Sungayang
Ka pakan mambali siriah
Siriah sarumpun jo silaronyo;
Kununlah nan Lareh Simawang
Tuah dicari hino nan buliah
Sampai batuka jo akanyo.
Parupuak upiah nan rareh
Ka lapiak panjamua padi;
Buruak untuangnyo Tuanku Lareh
Sajak babini Siti Rawani.
Kain salendang nak rang Guguak
Baragi basulam pulo
Sujian nak rang Bukittinggi;
Kasiah sayang jolong basusuak
Sadang kasiah sansaro tibo
Malang untuangnyo Siti Rawani.
Lorong kapado jaksa nan pansiun, habih piti badaso tidak, minyak habih samba tak lamak, arang habih basi binaso, tukang hambuih payah sajo.
Harok baminantu urang bapangkek, diadokan alek tujuah hari, dipotong kabau duo tigo, dipanggia urang sanagarinyo, nan jauah dilapeh surek, nan hampia kulansiang tibo.
Tipak di diri Tuanku Lareh, dek dukun siliah baganti, barakaik yakin inyo barubek, iyo lai agak baransua cegak, alah timbua pangana baiak, lalu dicubo bajalan-jalan, dimudiakkan labuah nan panjang,
82
