pabilo hati namuah luluah, nan panggamang lakeh jatuah, nan pancameh mati hanyuik.
Lorong kapado anak nantun, isuak kan batamu juo, kok lai kito ba amalan saleh, pulangkan sajo kapado Allah, itu nan kuaso dari kito.”
Alah sudah sapo manyapo, sarato salam bajawek tangan, bapisahlah inyo kaduonyo, bajalanlah Lareh Simawang, bajalan juo ka mudiak labuah.
Pado hari sahari nantun, duduaklah inyo di barando, duduak bajuntai di kurisi, baliau bapantun maso itu:
“Si upiak Siti Jalaka
Nan barumah badindiang camin
Parampuan lareh Koto Gadang;
Anak den Siti Darama
Ka mano kolah inyo bamain
Lah putiah mato dek mamandang.”
Pado maso dewaso itu, takana nan tapabuek, maminta tobat kapado Allah, pai sumbahyang inyo ka surau, tidak lupuik satu wakatu, itu karajo siang malam, mandoa tiok patang Kamih, dimintak safaat siang malam, kapado Allah Chaligul’Alam.
Indak elok dirandang kacang
Elok diambiak nan babungo;
Tak guno dipapanjang
Elok diambiak nan paguno
Kalau ado jarum nan patah
Usah dilatak di dalam peti;
Kok ado kato nan salah
Usah ditaruah dalam hati.
86
