↓Laman ko alah sah
hengong inyo ka kida ka tampek kamanakannyo Sutan Rajo Talauik Api sadangnyo tunduak manyimakan lalu mahadoklah baliau iyo kapado Datuak Bungsu,
- "Manolah Tuan Datuak Bungsu sarato Datuak Rajo Sakampuang pihak rundingan Tuan Datuak sajak bamulo sampai akia alah didanga nyato-nyato alah maalum dalam hati lah paham hambo diisinyo. Baa sakarang kini nangko pandang jauah nan dilayangkan caliak dakek ditukiakan kito barundiang bahadapan mengecek bamuko-muko bak kato urang tuo-tuo manarah mahantam bania kubak kulik ambiak isi. Karano inyo samo duduak Sutan Rajo Talauik Api mamintak hambo pado Tuan kok bana lai sasuai kok paham lai saukua nak tahantak dahan kabania nak hambo bao jo mupakaik-iyo jo urang nan kabuliah baa pandapek Tuan Datuak!"
Manjawab sanan Datuak Bungsu,
- "Jokok baitu kato Datuak lah iyo pulo tu kironyo-bak kato urang tuo-tuo-pamatang gadang bahamba basi baiak di ringgiki. Supayo rundingan capek putuih nak lakeh mandapek hasia lah elok bana disampaikan sipaik mananti
malah hambo."
Lorong Datuak Rajo Api bapaliang duduak maso itu mancaliak ka kamanakannyo lalu bakato inyo sanan,
- "Mano juo lah ang Buyuang Sutan Rajo Talauik Api rundiang lah samo Buyuang danga kok babisiak lah kadangaran kok mahimbau lah kalampauan. Baa sakarang kini nangko jawab dimintak pado Buyuang. Tapi saketek denai sabuik sabalun Buyuang manjawab pikia bana baiak-baiak kok pandang jauah balayangkan caliak hampia batukikan. Kok disabuik sajak dahulunyo antaro kami baduo iyo jo Tuan Datuak Bungsu kami lah lamo barakanan lah acok tapa-manapa kok singkek uleh-mauleh nan kurang tambah-manambah.
Tahadok rundingan nangko sapatuiknyo bana garan Bu-
