Karambia mudo ijau kulik
Ijau pulo pucuak palapahnyo
Sudah diureh saluruah badan
Jo aia karambia mudo
Sarato aia limau tujuah ragam
Baru dibaruik pulo kini
Jo aia sulo badak
Dari boto nan katigo
Aia bacampua aia zam-zam
Aia boto ka tigo ko
Diminum pulo mah saketek
Sabanta bana sudah itu
Lah tanang tampak Bujang Piaman
Angek badannyo lah turun pulo
Dirasoi kapalo jo kakinyo
Iyo dek dukun Katik Basa
Alah koh janiah aia mukonyo
Bakato inyo pulo kini
Manolah Tuanku Sari Alam
Sarato Tuanku Puti Payuang
Malin Duano iyo juo
Sarato adiak Bidasari
Tampuangkan tangan pado Allah
Kito mamintak pado inyo
Ditampuangkan tangan dek nan banyak
Jo aia mato bacucuran
Mandoa sanan Katik Basa
Mandoa babaso Arab
Indak ado nan mangarati
Mungkin inyo indak pulo
Sasudah doa diaminkan
Bakato pulo inyo garan
151
