Iyo jo kudo urang pai
Tapi padusi itu garan
Indak pulo dibiasokan
Inyo maracak kudo sandiri
Sadang dek Puti Payuang Lauik
Dek salalu marengek-rengek
Handak manunggang kudo sandiri
Ayahnyo mampaturuikkan
Liau sandiri nan maaja
Sarato Sutan Sari Alam
Tapi ka pai ka Kajaiko
Usah urang tacangang beko
Inyo tu haruih naiak kudo
Baduo jo Sutan Sari Alam
Barangkek urang nan batigo
Barangkek pagi-pagi bana
Hari pakan tu mah di Kajai
Usah usai balai baeko
Baru inyo katibo sinan
Dek Kajai duriannyo manih
Musim durian maso itu
Lah sampai di Simpang Ampek
Singgah sabanta karumah gadang
Rumah gadang Malin Duano
Tibo di rumah itu garan
Ruponyo urang lah mananti
Nasi talatak dihidangan
Makan basamo inyo dangai
Lah sudah minum jo makan
Lain pulo bunyi carito
Bukan tu kini si dubalang
Nan ka pai yo ka Kajai tu
Tapi iyo Bujang Piaman
69
