Rang bao abak ka kuburan
mande jo bunsu jo aia mato
Sudah dikarek daun tapak leman
pamindang lauak baledang
Lah sudah abak rang kubuakan
rang guluang kasua rang baok pulang
Di tapi sumua limau manih
tenggeran anak buruang gagak
manyasok minum ka tapian
Tampak kasua bunsu manangih
manyimbo bunsu ka rang banyak
di ma abak batinggaan
Sicerek di tapi rimbo
di baliak batang limau puruik
Kato amak e jo aia mato
abak nan jaan kau sabuik
Lah masak buah kalawi
di baliak batang limau kapeh
Adat mati tantu bakaji
bacakak saka jo sipadeh
Diruruik daun nilo nali
ka ubek anak rang Koto
Wakatu mangaji lai gak rami
di nan langang isuak tarasonyo
Sajak dikarek pauah janggi
nyo karek urang aia dingin
maleo-leo masuak padi
Sajak abak e sudah mati
tantangan si As jo Samsuddin
indak sikola anak lai
Page:Kaba Minangkabau 2.pdf/104
↓Laman ko alah sah
