Karungguahan hutang di galanggang
lah den rungguahan sawah gadang kau itu
Limpapeh di ateh munggu
ditangkok anak rang gubalo
Ka baa jawek dikau bonsu
cubo tarangkan ka wak ambo
Ka pakan ka kampuang jao
ari manjalang patang-patang
nyo susun-susun batang rambutan
ditabang anak rang Malalo
Manjawek bonsu jo aia mato
mano kak tangah badan ambo
anggak tapancuang lai putuih
sadatiak tak aka nyo ka ilang
nan bana adiak sabuik juo nyo
Ka parak batanam lado
nyo tanam pulo batang kundua
Kok lai buliah pintak jo pinto
mamintak ambo jo sungguh-sungguah
Anak nori tabang la sikua
ditangkok anak rang Sumaniak
Antikan juo malah ampok
antikan juo main judi
Ditabang batang karakok
tenggeran anak buruang nori
Ndak urang kayo jo ampok
ndak ado urang sanang jo judi
Nak nori tabang jo kekek
nyo saka dama dalam rimbo
Lah banyak rang kayo jatuah bansaik
lah banyak aji nan malesek
dek ulah jodi nan ko juo
Page:Kaba Minangkabau 2.pdf/27
↓Laman ko alah sah
