Ka dikarek batang kamulau
nyo saka daok ateh munggu
talang tatuga nyo Muaro
Kok nyo di adaik alam Minangkabau, ndeh diak kanduang
tampek rang manggadaiko tigo parkaro
dangakan dek Sutan nak ambo bacokan
Nan ka rimbo batanan lado
nyo sakah dama tangah laman
dama tatuga dalam padi
tenggeran anak buruang barabah
sikua maraok ateh ngarai
Tampek rang manggadai buyuang oi
Paratamo rumah gadang katirisan
kaduo rende gadang tak balaki
katigo maik tabuju tangah rumah, oi diak kanduang
matonya adaik tak dipakai.
Ka pakan ka ateh ngarai
hari manjalang patang-patang
nyo susun dama di Muaro
Di sinan yuang tampek rang manggadai
sinan ko tandeh ka tabang lelang
tak ado rang nan ka malarang
tapi kok kalah di galanggang ka dibao pulang yuang oi
sagadang benggo ambo tak suko
Tajelo talang ka subarang
dama tatuga dalam rimbo
tenggeran anak buruang antu
sikua maraok ka Muaro
Jawek Tan Mudo jo garetang
kok baitu kakak tuo tak ibo di diri ambo
ndak ibo di ambo ka taniayo
indiak ko awak saibu sabapa kak oi
mangko baitu ka tibonyo
Page:Kaba Minangkabau 2.pdf/34
↓Laman ko alah sah
