Bakato nak rang gubalo
"Tuan jo den di tuan
Jan lamo-lamo tagak disanan
Jirek urang jirek larangan
Indak buliah ditampuah urang
Nan punyo Puti Kasumbo
Urang baduo badunsanak
Nan tuo Puti Kasumbo
Nan ketek Puti Bonsu
Kununlah Puti Bonsu
Lakinyo urang bunian.
Kok ditampuah jirek nangko
Nan kok hati-hati samiang
Siapo masuak kasanan
Kok mati indak mambangun.”
Dek lamo bakalamoan
Bakato si Manjau Ari
"Den tampuah juolah jirek nangko
Janji ka mati-mati juo."
Lah sampai pulo kadalaman
Tampak di nyo bunyi-bunyian
Langkok saluang dangan rabab
Langkok bansi dangan sarunai
Langkok gandang jan kucapi.
Inyo barabab anyolai
Pueh barabab bakucapi
Hari nan sadang tangah hari
Dibunyikan pulolah saluang
Adang-adang didangakan
Bak bunyi di ateh langik
Adang-adang bak bunyi di awang-awang
Turun pitunang Nabi Daud.
Mandanga Puti Kasumbo
Lalu bakato anyolai
"O Kambang Adiak kanduang!
Sadang pangapan hari kini
Matohari tainyok-inyok
89
