Bakato si Manjau Ari:
"Manolah Ayah bundo hambo!
Baa bundo mamasan hambo
Baa hambo dihimbau pulang
Hambo baguru di surau."
Manjawab bundo ateh rumah:
"Indak kami mamasankan ang
Indak guno di kami lai
Manjau bajalan ang disiko
Pado rumpuik elok lah padi
Manjau Ari anak kanduang
Pado hiduik elok ang mati
Jan maragu-ragu kami."
Managih si Manjau di halaman:
"Indak patuik bundo bak itu
Indak sayang di hambo lai."
Bakato bundo di ateh rumah:
"Manjau bajalan ang di siko
Sabuah anak janjang ang tingkek
Satahun padi mahinda
Bakitu kato guru ang
Duo anak janjang ang tingkek
Mangirok ameh jo perak
Bakitu kato tuanku."
Manjawab si Manjau Ari:
"Ampunlah hambo Bundo kanduang
Kok tak buliah hambo ka rumah
Mintak nasi hambo di bundo
Lapa nan bukan alang-alang
Bundo barilah
Barilah bago nasi-nasi rasan
Bago kok siso-siso bundo
Bago kok rimah si Murai
Ka ubek paruik manggigik
Hauih nan tidak tatangguangkan
Raso ka rongkeh bubun-bubun
Raso ka pandak pandang denai."
Page:Kaba Si Manjau Ari.pdf/73
↓Laman ko alah sah
