Sabab tasabuik dalam tanuang
Kok inyo di nagari tu juo
Nagari kan hancua luluah
Dek Maulano urang sial
Tantang dek Puti Nilam Cayo
Bia inyo dunsanak kanduang
Iyo dek Rajo Angek Garang
Tapi budinyo lai aluiah
Dek atinyo lai elok
Bak talago di bawah gunuang
Aia nyo janiah ikannyo jinak
Urang cadiak urang jawari
Tampek basanda ambo rakyat
Alah mah tau inyo garan
Apo bana itu kini
Nan dimukasuik dek adiaknyo
Tapi inyo aniang sajo
Alun sudah urang barundiang
Tajadi garan nan ndak elok
Iyo nan kito sabuik cako
Dek itu muluiknyo lah tadorong
Manyuruah bakirok dang anaknyo
Diimbaunyo urang di ustano
Manyuruah angkek Pinang Masak
Inyo balari karumahnyo
Pai mancari Sutan Maulano
Dicari karuang tangah
Dicari kaateh anjuang
Anjuang kida anjuang suok
Indak tampak Sutan Maulano
Manangih garan Nilam Cayo
Dicari anak ka lapau
Katampek inyo biaso duduak
39
