Mari sayang mari diak kanduang
Buah hati pamenan mato
Urang tarancak di nagari
Usah ambo digigik juo
Usah ambo digurameh
Jokok taberang ambo beko
Nan buruak pulo nan tasuo
Dangakan bana kato Kakak
Nak sanang dalam paratian
Jokok Upiak malawan juo
Ndak namuah dibujuak elok-elok
Upiak tau dikareh ambo
Ambo cancang jadi bubua
Ambo hiruik darah adiak
Kato jantan ambo katokan
Tapi kok adiak elok-elok
Amuah manuruik kato Kakak
Kakak tanai bak minyak panuah
Kakak junjuang bak mangkuto
Kakak turuikkan nan di ati
Kakak bari sagalo kandak
Mungkin ado Upiak mandanga
Pinang Masak acok kanai berang
Tapi itu dek salahnyo
Matonyo iyo tajam bana
Iyo maliek Sutan Maulano
Tapi sekarang kini nangko
Sutan Maulano alah mati
Mati dibunuah urang parampok
Sananglah pulo ati ambo
Kok inyo iyo iduik juo
Matonyo indak kan ditahannyo
Iyo taradok adiak kanduang
Page:Rangkiang Luluih.pdf/99
↓Laman ko alah sah
