Tindiah batindiah arato tu
Tatumpuak bakeh inyo surang.
Sadangkan urang bakuliliang
Talabiah rando jo gadih
Malompek ka tapi labuah
Maliek urang ka barangkek.
Abih mamuji kasadonyo.
Alah sabanta inyo bajalan
Lah sampai inyo garan
Ka kampuang mande Buyuang Geleang
Singgah sabanta ka rumahnyo
Amak dilapeh pulo dek andenyo
Lah tibo inyo di laman
Abih turun kaduonyo.
Tangih mande Buyuang Geleang
Maliek anak bapakaian
Awak bangsaik indak bapunyo
Alun panah badan anak awak
Digisia pakaian cando tu.
Bakato mande maso itu
Mano adiak Sutan Tumangguang
Naiak daulu ka ateh rumah
Nasi mananti dihidangan
Makan juo sasuok duo
Rancak Dilabuah: Mano kakak Siti Chadijah
Sarato tuan Datuak Sampono
Usahlah kamni makan pulo
Bukanlah kami dek babaso
Sabanta nangko kami makan
Paruik kanyang nan dibawo
Rantau nan jauah nan ka dijalang.
Usali talalai kami di jalan
Page:Sutan Tumangguang Nan Rancak di Labuah.pdf/62
↓Laman ko alah sah
